โลกุตฺตเรน วิญฺญาปิตนฺติ ฯ

กุสลากุสลานํ พลวาพลวปญฺโห สตฺตโม ฯ

ภนฺเต นาคเสน อิเม ทายกา ทานํ ทตฺวา ปุพฺพเปตานํ อุทฺทิสฺสนฺติ อิมํ
เตสํ ปาปุณาตูติ ฯ อปิ นุ เต กญฺจิ ตโตนิทานํ วิปากํ อฏิลภนฺตีติ ฯ เกจิ มหาราช
ปฏิลภนฺติ เกจิ นปฺปฏิลภนฺตีติ ฯ เก ภนฺเต เต ปฏิลภนฺติ เก นปฺปฏิลภนฺตีติ ฯ
นิรยูปปนฺนา มหาราช นปฺปฏิลภนฺติ สคฺคคตา นปฺปฏิลภนฺติ ติรจฺฉานโยนิคตา นปฺปฏิลภนฺติ
จตุนฺนํ เปตานํ ตโต เปตา นปฺปฏิลภนฺติ อสุรกาโย ขุปฺปิปาสิโต นิชฺฌามตณฺหิโก เตสํ
ปรทตฺตูปชีวิโนเยว ลภนฺติ เตปิ สรมานาเยว ลภนฺตีติ ฯ เตนหิ ภนฺเต นาคเสน
ทายกานํ ทินฺนํ ทานํ วิสฺสาสิกํ โหติ อผลํ เยสํ อุทฺทิสฺส กตํ ยทิ เต น ลภนฺติ
นิรตฺถกํ โหติ ทานนฺติ ฯ น หิ ตํ มหาราช ทานํ อผลํ โหติ อวิปากํ ทายกาเยว
ตสฺส ผลํ อนุภวนฺตีติ ฯ เตนหิ ภนฺเต การเณน มํ สญฺญาเปหีติ ฯ ยถา มหาราช
เย เกจิ มนุสฺสา มจฺฉมํสสุราปานโภชนขชฺชกานิ ปฏิยาทาเปติวา ญาติกุลํ สมฺปฏิยาเทนฺติ
ยทิ เต ญาติกา ตํ อุปยานํ น สมฺปฏิจฺฉนฺติ อปิ นุ ตํ สพฺพํ ปหิตํ ปานโภชนํ
วิสฺสาสิกํ คจฺฉติ นสฺสติ วาติ ฯ น หิ ภนฺเต สามิกานํเยว ตํ โหตีติ ฯ เอวเมว
โข มหาราช ทายกาเยว ตสฺส ผลํ อนุโภนฺติ ฯ ยถา วา ปน มหาราช
ปุริโส คพฺภํ ปวิสิตฺวา อสติ ปุรโต นิกฺขมนมุเข กตเมน นิกฺเขเมยฺยาติ ฯ ปวิฏฺเฐเนว
ภนฺเตติ ฯ เอวเมว โข มหาราช ทายกาเยว ตสฺส ผลํ อนุโภนฺตีติ ฯ โหตุ ภนฺเต
นาคเสน เอวเมตํ ตถา สมฺปฏิจฺฉามิ ทายกาเยว ตสฺส ผลํ อนุภวนฺตีติ ฯ มยํ ตํ
การณํ วิโลเปมาติ ฯ

เปตานํ อุทฺทิสสผลปญฺโห อฏฺฐโม ฯ

ภนฺเต นาคเสน ยทิ อิเมสํ ทายหานํ ทินฺนทานํ ปุพฺพเปตานํ ปาปุณาติ เต จ ตสฺส
วิปากํ อนุภวนฺติ โย ปน ปาณาติปาตี ลุทฺโธ มนุสฺเส ฆาตยิตฺวา โลหินปาณี จ
ทุฏฺฐมนสงฺกปฺโป ทารุณํ กมฺมํ กตฺวา ปุพฺพเปตานํ อุทฺทิเสยฺย อิมสฺส เม กมฺมสฺส
วิปาโก ปุพฺพเปตานํ ปาปุณาตูติ อปิ นุ โข ตสฺส วิปาโก ปุพฺพเปตานํ
ปาปุเณยิยาติ ฯ น หิ มหาราชาติ ฯ เตนหิ ภนฺเต นาคเสน โก ตตฺถ เหตุ กึ
การณํ เยน อกุสลํ น ปาปุณาตีติ ฯ น เจโสว มหาราช ปุจฺฉิตพฺโพ น สกฺกา

สพฺพโลกํ เอกรสํ กาตุํ มาว มํ ตฺวํ วิสชฺชโก อตฺถีติ อปุจฺฉิตพฺพํ ปุจฺฉิ กิสฺส อกาโล
นิราลมฺโพติ ตํปิ มํ ตฺวํ ปุตฺฉิสฺสสิ กิสฺส คงฺคา อุทฺธํมุขา น สนฺทตีติ ตํปิ มํ ตฺวํ
ปุจฺฉิสฺสสิ กิสฺส อิเม มนุสฺสา จ ทิชา จ ทฺวิปฺปาทา มิคา จ จตุปฺปาทาติ ตํปิ
มํ ตฺวํ ปุจฺฉิสฺสสีติ ฯ นาหํ ภนฺเต นาคเสน วิเหสาเปกฺโข ตํ ปุจฺฉามิ อปิจ นิพฺพาหนตฺถาย
สนฺเทหสฺส ตํ ปุจฺฉามิ ฯ พหู มนุสฺสา โลเก ปาปคาหิโน วิจกฺขุกา กินฺติ เน โอตารํ
น ลเภยฺยุนฺติ เอวาหํ ปุจฺฉามีติ ฯ น สกฺกา มหาราช อเนน อนุมาเนน สหสา
ปาปกมฺมํ วิภชฺชิตุํ ฯ ยถา มหาราช มนุชา อุทกนิพฺพาหเกน อุทกํ สุวิทูรํปิ หรนฺติ
อปิ นุ โข มหาราช สกฺกา ตํ อุทกนิพฺพาหเกน วินา ฆนํ สุสิรํ มหาปพฺพตํ
อาโรเปตุนฺติ ฯ น หิ ภนฺเตติ ฯ เอวเมว โข มหาราช สกฺกา กุสลํ วิภชฺชิตุํ น
สกฺกา อกุสลํ วิภชฺชิตุํ ฯ ยถา วา ปน มหาราช สกฺกา เตเลน ปทีโป ปชฺชลิตุํ
อปิ นุ โข มหาราช สกฺกา อุทเกน ปทีโป ปชฺชลิตุนฺติ ฯ น หิ ภนฺเตติ ฯ เอวเมว
โข มหาราช สกฺกา กุสลํ วิภชฺชิตุํ น สกฺกา อกุสลํ วิภชฺชิตุํ ฯ ยถา วา ปน
มหาราช กสฺสกา ตฬากโต อุทกํ อาหริตฺวา ธญฺญํ ปาเปนฺติ อปิ นุ โข มหาราช
สกฺกา มหาสุมทฺทโต อุทกํ อาหริตฺวา ธญฺญํ ปริปาปิตุนฺติ ฯ น หิ ภนฺเตติ ฯ เอวเมว
โข มหาราช สกฺกา กุสลํ วิภชฺชิตุํ น สกฺกา อกุสลํ วิภชฺชิตุนฺติ ฯ
ภนฺเต นาคเสน เยน การเณน สกฺกา กุสลํ วิภชฺชิตุํ น สกฺกา อกุสลํ
วิภชฺชิตุํ ตํ การณํ มํ สญฺญาเปหิ นาหํ อนฺโธ อลกฺขิโก สุตฺวา เวทิสฺสามีติ ฯ อปุญฺญํ
มหาราช โถกํ ปุญฺญํ พหุกํ ปากฏา อกุสลํ กตํเยว ปริยาทิยติ พหุ กตํ กุสลํ สเทกํ
โลกํ อชฺโฌตฺถรตีติ ฯ ตํ อุปมํ กโรหีติ ฯ ยถา มหาราช เอกํ ปริตฺตํ อุทกวินฺทุ
ปฐวิยา นิปติตํ อปิ นุ โข ตํ มหาราช อุทกวินฺทุ ทส วา ทฺวาทส วา เตรส
วา โยชนานิ อชฺโฌตฺถเรยฺยาติ ฯ น หิ ภนฺเต ยตฺเถตํ อุทกวินฺทุ นิปเตยฺย
ตตฺเถว ปริยาทิเยยฺยาติ ฯ เกน การเณน มหาราชาติ ฯ ปริตตฺตา ภนฺเต
อุทกวินฺทุสฺสาติ ฯ เอวเมว โข มหาราช อปฺปตรํ กตํเยว ปริยาทิยติ น สกฺกา อญฺเญหิปิ
สํวิภชฺชิตุํ ฯ ยถา วา ปน มหาราช มหาเมโฆ อภิวสฺเสยฺย โสพฺภสรตฬากก
นฺทรปทรเภรโปกฺขรณิโย ธรณีตลํ นินฺนญฺจ ถลญฺจ ตํ สพฺพํ ตปฺเปนฺโต ปริปูเรนฺโต โส
มหาเมโฆ อปิ นุ โข มหาราช โส มหาเมโฆ เหฏฺฐโต จ ติริยโต จ สมนฺตโต จ
อุตฺถเรยฺยาติ ฯ อาม ภนฺเต ปูรยิตฺวา โส มหาเมโฆ โสพฺภสรตฬากกนฺทร-

ปทรเภรโปกฺขรณิโย ทสปิ ทฺวาทสปิ เตรสปิ โยชนานิ อุตฺตริตฺวา คจฺเฉยฺยาติ ฯ เกน
การเณน มหาราชาติ ฯ มหนฺตตฺตา ภนฺเต เมฆสฺสาติ ฯ เอวเมว โข มหาราช กุสลํ
พหุตรํ กตํ สกฺกา เทวมุนิสฺสาหิปิ สํวิภชฺชิตุนฺติ ฯ
ภนฺเต นาคเสน เกน การเณน อปุญฺญํ โถกํ ปุญฺญํ พหุกนฺติ ฯ ยถา
มหาราช โย โกจิ ทานํ วา เทติ สีลํ วา สมาทิยติ อุโปสถกมฺมํ วา กโรติ โส
หฏฺโฐ ปหฏฺโฐ หาสิโต ปกาสิโต ปสนฺโน ปีติเวทชาโต โหติ ตสฺส อปราปรํ ปีติ อุปฺปชฺชติ
ปีติมนสฺส ภิยฺโย กุสลํ อวฑฺฒติ ฯ ยถา มหาราช อุทปาโน อหุสลิโล สมฺปุณฺโณ
อุทเกน อุทกนฺติเก อุทเก นีหรนฺเตปิ นีหรนฺเตปิ อปราปรํ อุปฺปชฺชติ น สกฺกา โหติ
อุทกํ ขยํ เนตุํ เอวเมว โข มหาราช กุสลํ จินฺเตนฺตสฺส อปราปรํ ปีติ
อุปฺปชฺชติ ฯ วิสฺสสตํปิ เจ มหาราช ปุริโส กุสลํ กตฺวา ตํ กุสลํ อาวชฺเชยฺย อาวชฺชิเต
อาวชฺชิเต ภิยฺโย ภิยฺโย กุสลํ วฑฺฒติ ตสฺเสตํ กุสลํ สกฺกา โหติ ยทิจฺฉเกหิ สทฺธึ
สํวิภชฺชิตุํ ฯ อิทเมตฺถ มหาราช การณํ เยน กาเรณน ปุญฺญํ พหุกํ ฯ อกุสลํ ปน
มการาช กโรนฺโต วิปฺปฏิสารี โหติ วิปฺปฏิสาริสฺส จิตฺตํ ปฏิลียติ ปฏิกุฏติ ปฏิวตฺตติ
โสจติ ตปฺปติ ขียติ ปริหายติ นปฺปฏิวทฺธติ ตตฺเถว ปริยาทิยติ ฯ ยถา มหาราช
สุกฺขาย นทิยา สมนฺตปุลินาย อุณฺณตโอนตาย กุฏิลกุฏิลาย อุปริโต ปริตฺตํ อุทกํ
อาคจฺฉนฺตํ ขีจติ ปริหายติ นปฺปฏิวทฺธติ ตตฺเถว ปริยาทิยติ เอวเมว โข มหาราช อกุสลํ
กโรนฺโต วิปฺปฏิสารี โหติ วิปฺปฏิสาริสฺส จิตฺตํ ปฏิลียติ ปฏิกุฏติ ปฏินิวตฺตติ โสจติ
ตปฺปติ ขียติ ปริหายติ นปฺปฏิวทฺธติ ตตฺเถว ปริยาทิยติ ฯ อิทเมตฺถ มหาราช การณํ
เยน การเณน อกุสลํ โถกนฺติ ฯ สาธุ ภนฺเต นาคเสน เอวเมตํ ตถา สมฺปฏิจฺฉามิ
สุภินฺโน ภนฺเต นาคเสน ติตฺถิยานํ วาทกุฏิโล สุภินฺนา วาทคณฺฐิ นิหตา ปรปฺปวาทา
ลทฺธยสา ชินปุตฺตาติ ฯ

กุสลากุสลานํ มหนฺตามหนฺตภาวปญฺโห นวโม ฯ

ภนฺเต นาคเสน อิธ โลกสฺมึ นรนารี สุปินกํ ปสฺสนฺติ กลฺยาณํปิ ปาปกํปิ
ทิฏฺฐปุพฺพํปิ อทิฏฺฐปุพฺพํปิ เขมํปิ สภยํปิ กตฺตพฺพํปิ อกตฺตพฺพํปิ ทูเรปิ สนฺติเกปิ
พหุวิธานิปิ อเนกวณฺณานิปิ กปฺปสตสหสฺสานิ ปสฺสนฺติ กึ เอตฺถ สุปินํ นาม โก
วา ตํ ปสฺสตีติ ฯ นิมิตฺตเมตํ มหาราช สุปินกํ นาม ยํ ปฐมจิตฺตสฺส อาปาถํ
อุเปติ ฯ ฉ อิเม มหาราช สุปินํ ปสฺสนฺติ ฯ กตเม ฉ ฯ วาติโก สุปินกํ ปสฺสติ